ಜನ್ಮ ನೀಡಿದ ಭೂತಾಯಿಯ

ಜನ್ಮ ನೀಡಿದ ಭೂತಾಯಿಯ ನಾ ಹೇಗೆ ತಾನೆ ತೊರೆಯಲಿ

ಅನ್ನ ನೀಡಿದ ಈ ಮಣ್ಣನು ನಾ ಹೇಗೆ ತಾನೆ ಮರೆಯಲಿ || ಪ ||

ಈ ಗಾಳಿ ಈ ನೀರು ನನ್ನ ಒಡಲು

ಈ ಬೀದಿ ಈ ಮನೆಯ ತೊಟ್ಟಿಲು

ಈ ಮಾಚ ಈ ಕೆಂಚ ಎಲ್ಲಾ ಹೆಸರು

ಈ ನನ್ನೆದೆಯ ಹಚ್ಚೆಲೆಯ ಹಸಿರು || ೧ ||

ಈ ಗೌರಿ ಈ ಗಂಗೆ ಹಾಲ ಕುಡಿದೆ

ಓಡೋಡಿ ನಲಿದೆ ಊರೆಲ್ಲ ಕುಣಿದೆ

ಕಾಳವ್ವ ರುಕ್ಮವ್ವ ನನ್ನ ಎತ್ತಾಡಿ

ಹರಸಿದ ತಾಯಿಯರ ಹೇಗೆ ಮರೆಯಲಿ || ೨ ||

ಈ ಜೀವ ಈ ದೇಹ ಅರೆದು ಅರೆದು

ಹೊಸ ಆಸೆ ಹೊಸ ಹಾದಿ ಕನಸೆಂದು ತಿಳಿದು

ಬಾನತ್ತ ಭುವಿಯತ್ತ ಪೆಚ್ಚಾಗಿ ಓಡುವ

ಪಂಜರದ ಹಕ್ಕಿಗಳ ಹೇಗೆ ಮರೆಯಲಿ || ೩ ||